Na prome lugá mester rekonosé e strès di trabou na tempu.
Strès di trabou ta un kos ku ta hopi rekurente bou di trahadó. Si bo ta atento, bo por rekonosé e señalnan adelantá. Por ehèmpel, e trahadó ta reakshoná desorientá, e ta lubidá hopi, e ta reakshoná iritá òf ta mustra su malkontentu.
Trata na tene un kombersashon ku e trahadó. Dor di tene un kombersashon amplio ku e trahadó bo por haña sa kiko ta pasando i bo por buska un solushon huntu p’e. Hopi biaha e trahadó mes tambe tin su ideanan kon por laga e kosnan kana mas mihó i pa asina e tin menos strès na trabou.
Soru pa sufisiente rekreashon. Ora kos ta difisil pa e trahadó òf e tin e impreshon ku e ta kayendo den un abismo den su trabou, e por tin efekto negativo riba su prestashon. Hopi biaha e dunadó di trabou tin e tendensia di enfoká solamente riba e echo ku su kompanía tin ku prosperá, sin tene kuenta ku e trahadó tambe ke sinti su mes apresiá. Si tin espasio, organisá aktividat pa e trahadó nan, sea paden òf pafó di trabou. Presta atenshon na kosnan chikitu manera, hasimentu di aña, logro personal etc.
Yuda e trahadó desaroyá su mes. Ofresé training, kurso, estudio. Esaki no ta sèn perdí, ya ku un trahadó ku ta funshoná bon, ta perkurá pa bo kompanía drei optimal.
No spera ku e trahadó mester ta disponibel 24/7. Awendia teknología ta buta ku un persona ta muchu mas fasil aksesibel ku antes. Esaki tin su bon i su malu. Duna e trahadó su espasio pa e por disfrutá despues di ora di trabou òf riba su dianan liber.
Prepará e trahadó pa teknologíanan nobo. Hopi biaha e trahadó ta kustumbrá ku un sierto manera di traha i kambio por trese hopi strès pa e trahadó, espeshalmente ora ta trata di teknologíanan avansá. Duna e trahadó e oportunidat pa indiká ora e nò ta ta komprondé algu i tambe ofresé sufisiente guia pa esaki.
Duna bon ehèmpel. Tur hende ke keda tratá bon. Haña bon trato no ta konta solamente pa e kliente, pero tambe pa e trahadó. Un trahadó ku keda bon tratá dor di su superior/doño di trabou ta keda satisfecho. Aktitud robes di un superior/doño di trabou, ademas di ta stroba e komunikashon entre e ku e trahadó, por duna e trahado strès tambe. Kual ta pone ku esaki por tin impakto negativo riba funshonamente di e trahadó i ta influenshá e progreso di bo kompanía.
"When employees are happy, they are your very best ambassadors - James Sinegal - "